Tuesday 18 October 2011

chalne kaa hauslaa nahiiN

chalne kaa hauslaa nahiiN ruknaa muhaal kar diyaa
ishq ke is safar ne to mujhko nidhaal kar diyaa
milte hu’e diloN ke biich aur thaa faislaa ko’ii
usne magar bichhaRte vaqt aur savaal kar diyaa
ae merii gul-zamiiN tujhe chaah thii ek kitaab kii
ahl-e-kitaab ne magar kyaa teraa haal kar diyaa
ab ke havaa ke saath hai daaman-e-yaar muntazir
baanu-e-shab ke haath meN rakhnaa sambhaal (?) kar diyaa
mumkinaa faisloN meN ek hijr kaa faislaa bhii thaa
hamne to ek baat kii usne kamaal kar diyaa
(mumkinaa : possible)
mere laboN meN muhr thii par mere shiisha-ruu ne to
shah’r ke shah’r ko meraa vaaqif-e-haal kar diyaa
chehraa-o-naam ek saath aaj na yaad aa sake
vaqt ne kis shabiih ko Khvaab-o-Khyaal kar diyaa
muddatoN baad usne aaj mujhse ko’ii gilaa kiyaa
mansab-e-dilbarii pe kyaa mujhko bahaal kar diyaa

Did you like "chalne kaa hauslaa nahiiN"?